Ruhum Qarabağlıdır silsiləsindən

Yuxum ərşə çəkilib
Görmədiyim gündən səni
Gözümün yaşı kəsmir
Sənə gəlməyəndən bəri
Canım parçam-parça, ruhum pərişan
Diriykən ölüyəm
Sənsiz, Qarabağ!

Mənim yaralı atam,
Mənim bəlalı anam,
Qarabağ!

Türk torpağı, türk yurdu,
Gözlərimi yaş yudu.
Sənsiz niyə yaşayaq?!
Sənsiz necə yaşayam,
Qarabağ?!

Düşmən tapdağında qoymarıq səni,
Kafir caynağında qoymarıq səni,
Həsrətin qoynunda qoymarıq səni,
Müqəddəs andımız, ruhum,
Qarabağ!

Sənsiz qala bilmərəm!
Sənsiz ola bilmərəm!
Sənsiz ölə də bilmərəm,
Ölsəm, qibləm Qarabağ!