Fuad Ələsgərov: Azərbaycanın yeni konstitusiyası vəkilliyin hüquqi vəziyyətinin köklü şəkildə dəyişməsinə əsas yaradıb

siyaset
4-10-2019, 15:44 1257
Fuad Ələsgərov: Azərbaycanın yeni konstitusiyası vəkilliyin hüquqi vəziyyətinin köklü şəkildə dəyişməsinə əsas yaradıb Azərbaycanın yeni konstitusiyası vəkilliyin hüquqi vəziyyətinin köklü şəkildə dəyişməsinə əsas yaradıb.
Bunu Azərbaycan Respublikası Prezidentinin Hüquq mühafizə orqanları ilə iş və hərbi məsələlər üzrə köməkçisi - şöbə müdiri Fuad Ələsgərov Azərbaycan Vəkillər Kollegiyası və Almaniya Beynəlxalq Əməkdaşlıq Cəmiyyətinin birgə təşkilatçılığı ilə, Azərbaycanda vəkillik peşəsi ilə bağlı yubiley tədbirlər çərçivəsində “Güclü və nüfuzlu vəkillik – müasir dövrün çağırışları” mövzusunda keçirilən beynəlxalq konfransda deyib.
Onun sözlərinə görə, 1995-ci ildə referendum yolu ilə qəbul edilmiş Konstitusiya cəmiyyətimizin müasir, demokratik, hüquqi dövlət quruculuğu mərhələsinə keçidinin bünövrəsini qoyub: "Azərbaycanda fundamental hislahatların aparıldığı, azad sahibkarlığın inkişaf etdirildiyi şəraitdə yeni tipli vəkillik təsisatına zərurət yaranıb. Müstəqil Azərbaycanın yeni demokratik konstitusiyası vəkilliyin hüquqi vəziyyətinin köklü şəkildə dəyişməsinə, eləcə də onun insan hüquq və azadlıqlarının səmərəli təmini mexanizmi qismində formalaşmasına əsas yaradıb".
F.Ələsgərov vurğulayıb ki, insan hüquqlarının təmin olunması demokratik dövlətin təməl daşı və hər bir cəmiyyətin yetkinliyinin göstəricisidir: "Bu mənada 1998-ci ildə islahatların növbəti mərhələsində qəbul edilmiş "Vəkillər və vəkillik haqqında" Qanun hər kəsin yüksək keyfiyyətli hüquqi yardım almaq hüququ daxil olmaqla Konstitusiyada təsbit edilmiş hüquq və azadlıqların real təminatı kimi böyük əhəmiyyət kəsb edib. Almaniya Beynəlxalq Əməkdaşlıq Cəmiyyətinin iştirakı ilə hazırlanmış bu qanun vəkillərin yeni statusunu müəyyən edir. Habelə digər qanunvericilik aktları ilə birlikdə tərəflərin prosessual bərabərlik prinsipi təsbit edilib".
Prezidentin köməkçisi qeyd edib ki, məhkəmə-hüquq sistemində islahatların dərinləşməsi haqqqında Prezident İlham Əliyevin 2019-cu il tarixli fərmanında Vəkillər Kollegiyasının maliyyə müstəqilliyinin yüksəldilməsinə yönələn müddəalar nəzərdə tutulub: "Hazırda məhkəmə -hüquq islahatlarının davam etdirilməsi ilə bağlı hüquq-mühafizə orqanlarının əməkdaşlarından ibarət işçi qruplar fəaliyyət göstərir. Biz yeni qanunvericilik paketi üzrə işi yekunlaşdırmaq üzrəyik".