Ərdoğan Putindən üzr istəyib? - Açıqlama

Türkiyə Rusiyaya məxsus Su-24 təyyarəsinin vurulması ilə əlaqədar yalnız təəssüfləndiyini bildirib.
Bu barədə Trend-ə Türkiyə Prezident Administrasiyasından bildiriblər.
Administrasiyadan deyiblər ki, bununla əlaqədar RF Prezidenti Vladimir Putinə ünvanlanan məktubda Türkiyə Prezidenti Rəcəb Tayyib Ərdoğan Su-24 təyyarəsinin həlak olmuş pilotunun ailəsinə başsağlığı verib və hadisədən təəssüfləndiyini bildirib.
Məktubda vurğulanıb ki, Türkiyə Rusiya ilə münasibətlərin normallaşmasının lehinədir: "Ankara Moskva ilə münasibətlərin normallaşdırılması üçün heç vaxt diplomatik kanalları bağlamayıb. Türkiyə və Rusiya arasında münasibətlərin yaxşılaşması regionda böhranın həllinə müsbət təsir göstərəcək".
Qeyd edək ki, Rəcəb Tayyib Ərdoğanın Su-24 qırıcısının vurulmasına görə rusiyalı həmkarından üzr istəməsi ilə bağlı xəbərlər yayılıb.
Kremlin mətbuat katibi Dmitri Peksov Ərdoğanın bununla bağlı V. Putinə ünvanladığı məktubda "üzr istəyirəm" ifadəsindən istifadə etdiyini irəli sürüb.