Dinc sakinlərin qətlə yetirilməsi yolverilməzdir

MN:Dinc sakinləri qətlə yetirməklə ermənilər döyüş meydanındakı uğursuzluqlarının əvəzini çıxmağa çalışırlar.
Müdafiə Nazirliyi dinc sakinin qətlə yetirilməsi ilə bağlı sorğusuna cavab olaraq bildirib ki, ermənilər yaşayış məntəqələrimizi atəşə tutaraq dinc sakinləri qətlə yetirməklə döyüş meydanındakı uğursuzluqlarının əvəzini çıxmağa çalışırlar.
Ötən gün axşam saatlarında Ermənistan Silahlı Qüvvələri tərəfindən miaatanlardan da istifadə edilməklə Ağdam rayonunun cəbhəboyu kəndlərinin atəş tutulması nəticəsində mülkü şəxs Bağırov Bəhram Qaraxan oğlu həlak olub.
Maraqlıdır ki, belə vəziyyətdə beynəlxalq qurumlar, nədənsə, erməni tərəfinin itkilərinə dərhal reaksiya verdiyi halda Azərbaycanın yaşayış məntəqələrinin atəşə tutulmasına və dinc sakinlərinin qətlinə biganə qalır və ermənilərin cinayətlərinə düzgün reaksiya vermədən göz yumurlar.
Qoşunların təmas xəttində vəziyyətin gərginliyini, mülki əhalinin və hərbi qulluqçuların təhlükəsizliyinin təmin olunmasını nəzərə alaraq, Silahlı Qüvvələrimiz daha artıq dağıdıcı qüvvəyə malik zərbə vasitələrindən istifadə etməklə qarşı tərəfin hərbi obyektlərinə əvvəlcədən xüsusi xəbərdarlıq olmadan zərbələr endirmək hüququnu özündə saxlayır və bunun nəticələrinə görə məsuliyyət birbaşa Ermənistanın hərbi-siyasi rəhbərliyinin üzərinə düşür.
Bundan əvvəl isə qoşunların təmas xəttində qarşı tərəfin mövqelərimizə basqın etməyə cəhd göstərməsi nəticəsində ağır və qanlı döyüş baş verib. Nəticədə Silahlı Qüvvələrimizin bölmələrinin qarşı tərəfə güc tətbiq etməklə həyata keçirdiyi adekvat tədbirlər zamanı ona endirilən raket-artilleriya zərbələri nəticəsində Ermənistan Silahlı qüvvələrinin 4 hərbi qulluqçusu məhv edilib və 16 nəfərədək yaralısı var. Onlardan 10 nəfəri ağır vəziyyətdədir.
Erməni hərbi birləşmələrinin iriçaplı silahlardan, eləcə də 82 millimetrlik minaatanlardan istifadə etməsi nəticəsində Silahlı Qüvvələrimizin bir nəfər hərbi qulluqçusu əsgər Məmmədov Elşən Vaqif oğlu şəhid olub, 3 hərbi qulluqçumuz yüngül qəlpə yaraları alıb.
Ümumilikdə bu gün erməni silahlı bölmələri cəbhənin müxtəlif istiqamətlərində 60 və 82 millimetrlik minaatanlardan, həmçinin iriçaplı pulemyotlardan da istifadə etməklə sutka ərzində atəşkəs rejimini ümumilikdə 76 dəfə pozub. Azərbaycan Silahlı Qüvvələri əməliyyat şəraitini nəzərə alaraq düşmənin atəş nöqtələrinə, mövqelərinə və səngərlərinə 80 dəfə atəş zərbəsi endirib.
Bütün bu hadisələrin fonunda Ermənistan prezidenti Serj Sərkisyan son çıxışında işğal altında saxladıqları, bütün dünyanın Azərbaycanın ayrılmaz hissəsi kimi tanıdığı və qəbul etdiyi Dağlıq Qarabağı Ermənistan dövlətinin ərazisi adlandırıb. O, "Ermənistan - mən Ermənistan deyəndə isə Dağlıq Qarabağı onun ayrılmaz hissəsi kimi nəzərdə tuturam - planetin ən hərbiləşmiş ərazilərindən biridir", - deyib.
Bu gün isə Ermənistan prezidenti Serj Sarkisyan BMT-nin Nyu-Yorkdakı baş assambleyasında çıxış edəcək. Bu haqda məlumatı Ermənistan prezidentinin mətbuat xidməti yayıb.
O, öz çıxışını beynəlxalq "Raul Vallenberq" fondunun təşkil etdiyi nahar yeməyində edəcək. Rəsm nahar ABŞ-ın Konqresində təşkil ediləcək.
ABŞ-a səfər zamanı Sarkisyan ATƏT-in Minsk qrupunun həmsədrləri ilə görüşəcək, BMT-nin sülhməramlı missiyasına həsr edilmiş sammitdə iştirak edəcək.
Lakin, görünür, səfərin əsas mahiyyəti heç də beynəlxalq tədbirdə iştirak etmək deyil. Belə ki, səfər zamanı Ermənistan prezidenti ABŞ-dakı erməni icması, amerikalı sərmayəçilər və iş adamları ilə görüşəcək. Görünür, Ermənistan prezidenti səfər adı ilə "humanitar yardım" toplamağa gedir.