Azərbaycanın təhlükəsizliyi, Avropanın təhlükəsizliyi deməkdir - AÇIQLAMA

dunya
13-10-2020, 20:54 1342
Azərbaycanın təhlükəsizliyi, Avropanın təhlükəsizliyi deməkdir - AÇIQLAMATrans Adriatik Boru kəməri layihəsinin bundan sonrakı mərhələsini TAP-ın İtaliyanın qaz paylama şəbəkəsinə qoşulması prosesləri əhatə edəcək.

Bu barədə Oxu.Az-a Dövlət Neft Şirkətinin (SOCAR) ictimaiyyətlə əlaqələr və tədbirlərin təşkili idarəsinin rəis müavini İbrahim Əhmədov məlumat verib.

Onun sözlərinə görə, TAP-ın İtaliyanın qaz paylama şəbəkəsinə qoşulması noyabr ayının ortalarında baş tutacaq. Nəzərdə tutulduğu kimi ilin sonuna qədər təbii qazın kommersiya məqsədli İtaliya və Avropaya nəql edilməsi gözlənilir.

“Cənub Qaz Dəhlizinin sonuncu seqmenti olan TAP tamamlandı. Bunu TAP konsorsiumu elan etdi. Dünyanın bəlkə də ən böyük sənaye layihəsi olan Cənub Qaz Dəhlizi bütün maneələri dəf etdi və nəhayət reallaşdı. Cənub Qaz Dəhlizi 3500 km uzunluğunda bir-biri ilə bağlı olan 3 boru kəmərinin inşa olunması, 40 milyard dollar sərmayə qoyuluşu, dünyanın ən böyük qaz-kondensat yataqlarından biri olan “Şahdəniz” yatağının işlənməsi deməkdir. SOCAR da bu nəhəng layihənin bütün seqmentlərində - “Şahdəniz”, Cənubi Qafqaz Boru Kəməri (SCP), TANAP və TAP boru kəmərlərində iştirak edir.

Hazırda TAP boru kəmərinin İtaliyanın qaz şəbəkəsinə qoşulması ilə bağlı işlər hələ davam edir və gələn ay başa çatacaq. İlin sonunadək Azərbaycanın təbii qazı, tarixdə ilk dəfə olaraq, birbaşa xətt üzrə Avropaya çatdırılacaq. Bununla da Azərbaycan Avropanın enerji təhlükəsizliyində öz rolunu daha da artıracaq. Azərbaycanın təhlükəsizliyi - Avropanın təhlükəsizliyi deməkdir.

Cənub Qaz Dəhlizi Azərbaycanın müstəqilliyini möhkəmləndirir, çünki biz öz enerji resurslarımızı özümüzə aid olan boru kəmərləri vasitəsi ilə dünya bazarlarına çıxarmağa nail olduq. Bununla Azərbaycan həm də gələcəkdə Avropa və Asiya arasında enerji daşınmalarının hesabına - mərkəzinə çevrilmək imkanını əldə edib”, - deyə o bildirib.

Qeyd edək ki, artıq TAP layihəsinin tikintisi rəsmi olaraq başa çatıb.